Breek los uit die ou groewe

“Niemand gooi nuwe wyn in ou velsakke nie… nuwe wyn moet in nuwe velsakke gegooi word.” – Lukas 5:37-38

In aansluiting by die werk van Thomas Moore en die tema wat ek tans volg, gee ek graag aandag aan die verskynsel dat ’n mens dikwels aan die bekende wil vashou wanneer omstandighede verander. Dit is menslik om in ou maniere en gewoontes van doen vas te val, veral wanneer die omstandighede rondom ons só verander dat dit ons bang maak vir die toekoms. In sulke omstandighede probeer ons dikwels beskerm wat ons het, in plaas daarvan om te vra: Wat is dit wat nuut gebore wil word?

Veranderende omstandighede is soms juis uitnodigings om nuwe weë te vind in die plek van die ou weë wat nie meer werk nie. Wanneer dit gebeur, is dit nie die einde van jou roeping nie, maar eerder die Here wat jou uit die ou “velsak” druk sodat jy met nuwe kreatiwiteit in ’n nuwe “velsak” kan invloei.

Roeping is dinamies, nie staties nie. Vra jouself af: Wat wil God vandag in hierdie veranderende gemeenskap doen met die unieke wysheid wat jy oor jare opgebou het? Soms moet die ou patrone breek sodat die nuwe wyn van die Gees weer vrylik kan vloei.

Mag die Here jou bewus maak van nuwe geleenthede en uitdagings as deel van sy roeping, en mag Hy jou bystaan sodat die onsekerheid wat verandering soms meebring, jou nie sal oorweldig nie.

18/08/2026